馬國明避談赴美探心穎
黃心穎因偷食人夫許志安而避走美國，有指她不斷以電話攻勢氹掂馬國明赴美探望。昨日馬國明出席無綫劇宣傳活動時被問及此事，只回應：「件事過咗咁耐仲講！」
無綫劇集《白色強人》演員馬國明、唐詩詠、馮盈盈與何廣沛等昨日出席宣傳活動，有傳因「安心偷食」避走美國的黃心穎，以越洋電話攻勢氹掂馬國明到美國探望，惟此舉令馬母相當生氣。對於此傳聞，馬國明明顯不想提，只說：「唔講喇，過咗咁耐仲講！」
近日他被拍得拖着媽媽行街，被讚孝順，網民都祝福他盡快找個女友，問到伯母可有心急？他笑說：「隨緣啦！阿媽急呀，話想再買間大啲嘅屋，唔係住多個人，係想住得舒服啲。」唐詩詠在旁笑言劇集出街後，應該有不少女仔排隊送上門。
唔介意再拍定欣
不少網民覺得馬國明與舊愛胡定欣匹配，無綫亦有意開劇撮合他們「復合」，他表示未收到通知：「都係聽人講，嚟緊套劇唔係同定欣，但係都唔介意合作。」《白》劇播出後，觀眾大讚飾演醫生的他有型靚仔，他笑說：「出街都有人讚有型嘅，做咗十幾年大家先發覺，我覺得自己好失敗，其實係制服有型，制服誘惑！」
馮盈盈論盡仆低
同場的馮盈盈玩遊戲時論盡仆低，自嘲沒有運動細胞的她，自認經常論盡跌倒。最近與醫生男友「寶寶」展開同居生活的她，笑言冇覺好瞓：「晚晚都搞到一、兩點，好多體力勞動，身水身汗……咁做家務，依家終於發覺媽媽好偉大。」她自爆同居生活烏龍百出，家中漏煤氣漏足4日，還以為是新裝修氣味：「我仲點香薰辟味，到媽咪上嚟先發現係漏煤氣！個燙斗就開咗24小時，燙衫板都燒燶埋，仲洗爛咗一機衫。（男友『退貨』？）有呢啲經歷之後，佢更加覺得自己係有用嘅男人，佢唔係少爺，因為屋企仲有個大小姐。」