為父戰勝情緒病 何雁詩揮桿追奧運夢

何雁詩日前與爸爸接受本報專訪，何媽媽帶愛犬陪伴，但怕醜拒絕上鏡。談到何爸爸最難忘的父親節，阿詩在旁偷笑說：「大鑊嘞！考起佢！」何爸爸笑言最重要一家人齊齊整整：「佢有時畫張卡，有時話爭住先，爭爭吓就唔記得咗。」

何雁詩在爸爸培養下，六歲開始打高爾夫球，不但變成「親子活動」，更是一門三傑：「其實媽媽打得最叻，佢最近贏咗個比賽。」八年前阿詩曾代表香港打亞運，去年強勢復出的她，在香港女子業餘錦標賽封后，在何爸爸心目中女兒很有水準：「我個女唔差(o架)，希望佢可以有機會打奧運。」阿詩坦言距離這個目標還有很遠的路。

習慣高壓生活

阿詩憶述早年患情緒病時，爸爸曾憂心得衝入其房間喊着說：「你老竇得你一粒女，我真係好擔心你。」令她決意要好起來：「爹哋好少喊，好少喺人面前表露佢嘅情緒，嗰刻我就提自己要好起嚟。」何爸爸坦言父母當然望子成龍，亦可能因而給予女兒壓力，但阿詩卻表示自小已習慣了這生活模式：「我好記得爹哋講，你一係唔好打，一打就要打到最好，所以我希望樣樣都做到最好。」

何爸爸視女兒為掌上明珠，千依百順。

鄭俊弘投其所好，成功入屋。

口水佬啱嘴形

阿詩與鄭俊弘（Fred）拍拖兩年，曾有傳何爸爸不鍾意Fred，他親口否認，表示從不會對女兒交友有任何意見：「因為我唔知佢嚟真定嚟假，到佢哋話真係拍拖，我就擘大對眼睇吓，呢個男仔都幾好，好尊重長輩老人家，幾孝順。」阿詩笑爹哋鍾意Fred多過自己：「佢哋好多嘢傾，兩個口水佬。」何爸爸表示不會催女兒結婚，而阿詩坦言將來有小朋友，最想由爹哋親自教打Golf。

場地：園藝高爾夫中心