湯洛雯做「插班生」狂食螺絲
湯洛雯被欽點頂替黃心穎於《法證先鋒IV》的角色，更被勒令開工前速減10磅，豈料她似乎中了「不瘦降」，惟有專心拍戲，但首日開工即狂食螺絲，壓力超級大。
藝人湯洛雯及黃浩然前晚於觀塘海濱拍攝無綫劇集《法證先鋒IV》，黃心穎偷食人夫許志安的事件，令湯洛雯要頂替她的角色進行補拍，只是開了工3日，湯洛雯起初相當緊張：「慢慢同工作人員、導演、演員多啲交流，依家開始冇咁緊張。最記得第一日開工，緊張到成日食螺絲，情況非常嚴重。」她又自嘲記性一般，要勤做功課熟讀劇本，並感謝劇中最多對手戲的黃浩然和譚俊彥協助，她說：「黃浩然同埋譚俊彥都好有耐性幫我，令我冇咁大壓力，好感恩有佢哋做拍檔。」
減肥？開工就容易瘦
說到之前監製梅小青要她減肥，問是否已達標？她即笑說：「開工會容易瘦啲，因為唔夠瞓，自己亦會食得健康啲，但係依家唔諗減肥問題，我呢個插班生首要係努力演好角色。」
而黃浩然得知湯洛雯感謝他協助投入拍攝時，他說：「我哋呢個團隊真係好齊心，大家一路會互相幫忙、鼓勵，亦都明白到佢會好大壓力，我自己亦都緊張嘅，所以大家都想畀一個輕鬆啲嘅環境佢，同埋睇吓佢有啲咩要協助。」被問到重拍是否難以適應？他說：「其實都難嘅，所以要去諗番角色前前後後，不過都順利。」