「駿王」爆63倍大冷 劉小慧攬老公喊
自封「得閒修女」的劉小慧，於馬場上演「修女也瘋狂」！皆因曾有腳患兼心律不正的愛駒「駿王」，為她及老公蘇志威爭口氣，以63倍爆大冷姿態跑第一。賽後見兩公婆攬住喊，小慧更不顧儀態，飛身撲向愛駒狂咀，興奮心情比「蛋黃油」成為熱話更hyper一千倍！
藝人劉小慧最近開live教煮蛋黃油紓緩濕疹而成網紅，昨日她與歌手老公蘇志威到沙田馬場，捧名下愛駒「駿王」出賽第五場，由於愛駒上次比賽時不肯跑而被拉停，惹來退役揣測，賽前成為63倍的冷門。旺開有條路的小慧，以無敵氣場「加持」愛駒，令牠如有神助，在騎師郭能策騎下跑第一，獨贏買十元收636.5元，頭馬獎金逾52萬，馬主可得七成，令蘇氏夫婦袋逾36萬獎金。
攬愛駒狂咀
贏錢事小，贏馬是大！蘇氏夫婦在會員席直擊「駿王」衝線一刻，蘇老闆激動揮拳，然後攬實老婆一齊喜極而泣，斷估開心過將來嫁女！之後二人到凱旋門拉頭馬，小慧懶理腳踏高跟鞋，飛撲向「乖仔」狂咀，全程表現激動。影拉頭馬相時，小慧咀騎師郭能之餘，又摸練馬師鄭俊偉面頰。
小慧於馬場受訪時表示之前收看東網，指日本有一匹屢敗屢戰的「春麗」，笑指「駿王」是「港版春麗」：「其實我同蘇志威先係『春麗』，因為我哋有不屈不撓嘅精神，雖然『駿王』有唔少傷患，但我哋唔會放棄，同埋好多謝鄭俊偉悉心照顧，郭能可以繼續騎。」之後她接受電話訪問，記者笑問「駿王」是否搽了她的「蛋黃油」？她說：「梗係冇啦！佢點搽得o架？（你好旺喎！）係呀，旺過做女（藝人）嗰時。」
投注唔過一萬
而蘇老闆表示收到逾百個WhatsApp恭喜，又指「駿王」之前表現失準，全因試過比賽時遭其他馬踩傷：「之後再遇踩傷佢嘅馬就影響心情。（『駿王』幫你第二次拉頭馬。）證明我嘅堅持係啱。（投注咗好多？）少少啦，冇一萬咁多。」