朱晨麗怨何廣沛孱仔受累仆瘀腳
朱晨麗與何廣沛日前為劇集拍攝落水戲，但明讚暗踩取笑他孱仔，踢爆他拍攝時突然體力不支暈低，連累她仆低弄瘀雙腳。何廣沛則反擊指朱晨麗沒良心，忘記他變身「人肉墊」飛身相救。
無綫新劇《大醬園》演員何廣沛、朱晨麗、吳業坤及龔嘉欣等前晚在將軍澳電視城開工。近日頻頻落雨，朱朱與何廣沛日前還要到荒郊拍攝，問到會否特別辛苦？她雖然明讚何廣沛，但暗彈他孱弱：「尋日我哋拍落水戲，講我喺條河沖涼，佢就游水。佢為咗場戲要減肥、操弗、又要食雞胸肉，但係拍嗰陣就冇體力暈咗，連我都跟住仆咗落去。」
飛身做「人肉墊」救美補鑊
暈一暈的何廣沛慶幸沒有大礙，還反擊朱朱說：「原本以為佢會讚我為套戲付出好多，但原來係話我孱弱。」問到可有錫番何廣沛補數？她笑說：「唔錫佢啦！佢本來要撐住我，但係佢企唔穩，搞到我都仆埋落去，整到隻腳瘀晒。」何廣沛再次反擊：「你又唔講你跌低嗰陣，我飛身埋去托住你，我自己就跌低咗。」朱朱見狀「轉軚」讚他：「係呀！佢變咗人肉墊咁墊喺下面。」又指不介意《法證先鋒IV》重拍可能令兩劇重疊開工，最重要是劇集能夠出街。
吳業坤遭追撞 座駕重傷
至於吳業坤日前駕車時突然被一輛私家車追撞，慶幸沒有大礙：「自己係好心軟嘅人，所以交畀朋友調解，最緊要人冇事，見對方落車都按住個心口。（佢見你係吳業坤先咁做？ ）唔知佢知唔知，但係我架車又真係幾傷，估計要整五位數字，所以諗不如換車，但係依家通晒天，賣出去又唔值錢。（考慮唔揸車？）唔會！我都係畀人撞，我係一個安全嘅駕駛者，喺路上面見到我唔需要擔心。（買咩新車？）都係買慳油嘅二手車，做個慳家小朋友。」