人狗黐住玩 Ana R.最愁囡囡「大無畏」
名模Ana R.與英籍老公育有兩名子女，2015年誕下大女Maya，去年再誕下兒子Ryan，加上兩隻愛犬Lily-bear和Angel，一家「六口」幸福滿瀉！3歲多的Maya與兩隻狗狗成為好朋友，日常互動十分有愛，不過現階段仍未有危機意識的她，經常令到Ana心驚驚：「佢咩都唔驚，可以話呢個係缺點，佢同屋企兩隻狗狗相處好有趣，鍾意挨落狗狗身上一齊玩。問題係去到其他地方，佢冇意識出面嘅狗仔同屋企嘅狗係有分別，好擔心佢衝上去攬住啲狗仔。」
講道理唔體罰
當第二個孩子出生時，不少家庭都會遇到小朋友不想跟弟妹分享父母的愛而呷醋，Ana表示Maya未有此情況，反而經常搶着要照顧弟弟，但亦有任性的時候：「我唔會用體罰方式教Maya，會先同佢講道理，如果佢手多多攞唔應該攞嘅嘢，我會令佢明白我嘅意思，暫時唔想嚴厲懲罰佢。可能到佢4歲時會轉變教育方式，因為依家佢唔係好明我講嘅嘢，淨係知道Sorry呢個字，所以如果佢唔肯道歉，就要解釋點解囉。」
Ana R.育兒貼士
1.培養責任心，子女要自行收拾玩具。
2.勿體罰，要解釋子女如何犯了錯。
3.發掘天分，從日常舉動了解子女感興趣事物。
