余德丞心癢想拍劇
藝人余德丞昨午到鑽石山出席有關心臟急救活動，自去年踢波出現突發性心律不正入院治療後，他身邊起碼有10個人，包括余母及其助手，都跑去學急救：「真係好花時間，上堂要上足7、8個鐘。（包括蔡思貝？）佢可能一早已經識呢？況且拍劇咁忙，我遲啲問吓佢先。」
雖然身體已逐漸康復，但他暫時仍未能「復出」拍劇：「醫生話起碼要休息一年。睇番之前拍落嘅劇，都好難忘。（《鐵探》好似話原班再合作喎。）聽講開拍前傳，撞到監製蘇萬聰，佢都話好歡迎我。（客串？）客串都好，不過作為演員，梗係想挑戰一下自己，演比較重要嘅角色。」