肥媽寧煮餐懵拒洗廚房
藝人肥媽昨日出席千色CITISTORE X 雅窗牌呈獻「肥媽與您同享母親節暨ABA殺菌家品發布會」，提到母親節，她笑言一樣要煮餐死：「叫佢哋煮，即係我要洗廚房，佢哋煮完好似打仗咁，之前試過煮畀我食，我洗廚房洗咗三個鐘。」
提到去年她為某集團做搞手舉行慈善晚宴，但該集團老闆未有捐出善款，對此，她表示已入稟小額錢債審裁處：「我自己都墊支咗四十幾萬，做咗幾十年慈善都未遇過咁嘅事，都唔明點解佢哋會咁做，因為佢哋屋企係好有錢。」問下次做慈善會否更謹慎？她坦言以後不會再當搞手，只會捐錢：「其實今次唔係錢嘅問題，幾十萬我當跌咗或者捐咗，但佢咁做係陷我於不義，我覺得好唔開心。」