周家蔚管教甩繩馬騮狂向大仔洗腦

藝人周家蔚（Janet）與老公洪天明婚後育有兩個寶貝仔，分別是6歲的洪大仁（TJ）和4歲的洪竟琋（JT），一家四口樂也融融。不過兩子正處於「甩繩馬騮」階段，經常在家中打架，令她十分苦惱：「兩個喺屋企成日都鬧交又打交，其實對我嚟講都係個好大嘅挑戰，教咗佢哋好耐都唔聽。有一次將兩兄弟分開，然後同佢哋講如果繼續落去，Daddy就送佢哋去寄宿學校，冇得見爸爸媽媽，亦冇得見兄弟對方。」但她笑言不出幾日，一切打回原形，兩人又再次打打鬧鬧。

深情抱抱

雖然擁有雙倍的煩惱，但快樂也同樣雙倍，兩兄弟一時糖黐豆，一時水溝油，為洪家增添不少歡樂。Janet笑說：「之前我哋帶細佬去學校探哥哥，佢哋一見到面，好似失散咗十年嘅兄弟咁攬住唔放，兩個好似膠水黐埋，掹都掹唔甩，好Sweet！」

周家蔚為洪天明誕下兩子，雙倍感受快樂和煩惱。	兩兄弟其實好老友。	身為哥哥的大仁，都有愛錫細佬的時候。

潛移默化

現在她不時向大仔灌輸正面思想，有次還藉着學校活動，加深兩兄弟的感情：「老師喺感恩節問TJ對咩最感恩，我當然畀細佬張相佢，同佢講要多謝細佬，因為細佬對你真係好好。你同佢講多啲，佢就當咗係真。佢返學分享完之後，兩兄弟之間有所轉變，所以有時家長唔好氣餒，要不停灌輸正面嘅思想畀小朋友，咁佢哋就會成日開開心心，聽聽話話。」

育兒貼士

1. 要有耐性

2. 要公平

3. 教小朋友懂得互愛