高海寧入戲太深見楊明即喊

高海寧與楊明首次孭重飛做主角，心情緊張又興奮。

首度孭重飛的高Ling透露拍攝時幾乎冇瞓覺，每日收工返家睇劇本，更試過連續一星期拍喊戲，以致眼腫開工。問到當時情緒是否很低落？她說：「好Down，睇住劇本都流眼淚，嚇親媽咪問我咩事。今次係我最入戲嘅一套劇，總之一見楊明就會流眼淚。」提到被指頂替黃心穎到巴塞隆拿工作，高Ling承認：「係做一間保險公司Annual Dinner司儀，我已經第二次幫呢間公司出埠工作，都開心，因為可以順道放假。」同樣頂替心穎、與黎諾懿到馬來西亞拍節目《懿想不到》的楊明透露，於當地68樓作高空挑戰：「我有畏高，一行出去就腳軟，不過諾懿仲嚴重過我。」

湯洛雯壓力大生粒粒

至於靚湯表示正為劇集《法證先鋒Ⅳ》展開地獄式減肥，見她下巴生粒粒，問到是否大壓力？她說：「完全冇壓力就假嘅，咁短時間要準備角色，下星期又去歐遊，已經講明唔食嘢，畀自己一日食一杯雪糕。」此外，江嘉敏已落實頂替心穎拍攝劇集《牛下女高音》。

湯洛雯笑言去旅行冇得放肆食。

林秀怡指陸永愛搞Gag，拍攝時充滿歡樂。