黐實愛女至安心Celia K.睇戲中途閃
藝人郭穎兒（Celia K.）自從為老公李冠鋒誕下現年2歲的大女Galia及9個月大的細女Lia，主力留在家中相夫教女，不惜放下演藝事業，將全副心機放在家庭上。
擔心到抑鬱
面對180度的轉變，她透露懷有大女時心情相當複雜，直至囡囡出世後就明白到「為母則強」，隨即飛快成長：「初初轉做全職媽咪，心情好忐忑，覺得自己明明仲係人哋個女，但咁快就要再去照顧第二個女，好唔適應，所以大女出世嗰陣都好難以置信，亦試過擔心到有抑鬱，不過慢慢就明白到做人媽咪責任重大，亦係呢種母性令我企番起身，迅速地成長。」
Celia將女兒放於第一位，更自爆有次到戲院睇戲，因不捨女兒而中途離場：「我記得生完大女，差唔多三個月左右，我同老公去睇戲，睇咗十幾分鐘，我個心就好唔舒服，覺得好內疚，覺得自己掉低咗囡囡，即刻起身衝返屋企，依家諗起覺得好搞笑，但相信係每個媽媽必經嘅階段，所以我依家好少去旅行，做咩決定之前都要兼顧兩個女先。」續指現時仍在學習階段中，希望盡努力讓女兒擁有健康快樂的童年。
育兒貼士
1.心境開朗：懷孕時盡量保持正面、心境開朗，誕下的嬰兒會比較樂天。
2.家人協助：老公應多參與照顧小朋友，能減輕媽媽壓力之餘，亦讓小朋友有更完整的成長環境。
3. 參考意見：可多請教長輩、參考育嬰書，從而找出最適合自己的一套方法。