藝人衛詩雅遇交通意外，涉及七車連環相撞，嚇到魂魄唔齊，慶幸安全帶救回一命。經此一嚇，剛考獲電單車牌的她，揚言不敢揸兩個轆。
衛詩雅前日於社交網發文，稱遇到交通意外，留言：「今朝遇到交通意外……七車連環相撞……好彩我攬咗安全帶，如果唔係真係成個人飛出嚟，嚇到成個人呆晒。」又大呼好彩完全沒有受傷，是不幸中之大幸。
記者致電慰問衛詩雅，她依然感到恐懼，指逃過一刧，並憶述事發經過：「我搭車坐後座，經吐露港公路，因多車又加上4線轉3線，當時我低頭撳電話，感覺到架車急停，一秒間，我就撞埋前面座位椅背度，當時好擔心後面嚟緊嘅車係咪收得切油，好彩係一部的士撞埋嚟，當時我電話、手袋都飛出去啦！跟住第3架、第4架撞埋嚟，（力度）都輕咗，7車連環相撞，我哋係第二部車，好彩人冇事，好驚自己條頸Chok親，最好彩係我有戴安全帶，唔係我諗我會撞埋前面椅背流鼻血，算係不幸中之大幸！以後無論如何，坐咩車都要戴安全帶呀！」
她早前考獲電單車牌，方便日後拍戲，惟經過今次交通意外，嚇得她不敢揸電單車：「考到都唔敢揸，如果係揸電單車，今次我諗會死咗啦！」不少網民即留言慰問，叮囑她要作詳細檢查，更叫她快快還神。
此外，衛詩雅前晚相約好友李蘊食飯，未知是否定驚？李蘊更帶同兩個小朋友出席，還將相片放上社交網。