「星爵」Chris駕到鍾嘉欣瘋狂集郵

「星爵」Chris Pratt來港，昨晚於金鐘出席品牌活動，大批漫威粉絲一早到場，不少粉絲以Marvel人物打扮現身，手中還拿着Chris的海報及雜誌。Chris甫到場，粉絲尖叫聲不斷，鍾嘉欣（Linda）化身主持歡迎他，十分興奮大讚他高大。Chris表示首次來港，覺得香港是好好城市，還賣口乖說：「我愛香港。」又謂感恩此片獲大家支持：「好開心套戲咁成功，好多謝大家支持。拍呢套戲我用咗超過一年去準備，拍咗二百幾日，過程亦十分複雜。（有冇有趣嘢同大家分享？）同Iron man羅拔唐尼（Robert Downey Jr.）成為咗好朋友，我哋有一齊出街食飯，佢煮嘢畀我食，大家Share食，真係好開心。」之後Linda怕醜表示想與Chris合照，他友善接受，之後不少藝人上台要求合照，他都來者不拒，盡顯親民。

獲讚踏實好男人

Linda早已期待集Chris郵，她說：「我有睇佢嘅戲，好多朋友知道我做呢個活動都好羨慕好妒忌。我覺得佢好踏實、係好男人。」又透露已留港一個月，最開心囡囡講多了中文，又表示囡囡愈來愈有她的影子：「我覺得佢好似《搜神傳》入面嗰個好彩妹。」又謂與老公有傾過回港居住：「就算返嚟佢都會繼續做脊醫，佢好鍾意幫人醫痛症。」

Chris襲港，吸引大批粉絲捧場。	單身的茅子俊直言好想拍拖。	琦琦（左三）等人紛紛與Chris合照。

同場還有憑內地劇集《皓鑭傳》爆紅的內地男星茅子俊，他透露在港逗留兩、三日，昨日已到廟街食大牌檔、牛雜等。單身的他很想拍拖，問到會否找香港女孩？他即大讚：「香港女孩特別好，有主見，容易相處。」

「違規」拍花絮斷正

此外，Chris在社交網站Instagram上載拍攝《復》的幕後花絮，其中他拍下「美國隊長」基斯伊雲斯（Chris Evans）與羅拔唐尼及一班英雄準備時的情形，期間基斯見到他「違規」拍攝，走過來扮打他，場面搞笑！Chris留言：「我記得拍《復仇者》時呢一幕好震撼，現場係唔畀用手機拍攝，但我就唔理，冇嘢可以阻止我把握呢個一生一次嘅機會，影低咁多巨星，喺呢間房呢個組合可一不可再。我哋好幸運。」