蔡一鳳湊B講紀律

名媛蔡一鳳去年誕下龍鳳胎,雖然忙於打理生意,但照顧一對寶貝仔女,絕不假手於人,餵奶、換尿片樣樣齊,更爭取時間與龍鳳胎親子活動,樂在其中。

前亞視高層盛品儒與名媛太太蔡一鳳2015年結婚,去年誕下龍鳳胎,取名盛樂芙(Lov)及盛樂林(Lorin),新手媽媽產前做足功課,產後雖然立即要坐鎮公司,但放工回家定必親自照顧Lov及Lorin,換片、餵奶不在話下。

唱歌仔.按吓摩

她直認注重親子關係,增進感情:「氹佢哋瞓覺啦,瞓之前會讀啲Bedtime Story畀佢哋聽,又唱吓兒歌。佢哋沖完涼,就幫佢哋全身按摩、搽吓Cream,有親密嘅接觸,呢啲都係好好嘅親子活動!」她還為Lov及Lorin記錄飲奶及睡覺時間,方便安排適當的作息:「譬如阿B飲奶,可以堅持到4、5個鐘先飲一次,最多唔會超過180ml,依家佢哋瞓覺都好好,比較有規律,幾乎戒咗夜奶。平時我喺返工時間都會睇吓佢哋,因為屋企裝咗好多Cam,睇吓工人有冇按照我嘅要求湊B。」

育兒心得

1.注意尿片,BB少少濕都會唔舒服,不小心會有紅PatPat。

2.會揀選較滋潤的潤膚露,特別囡囡較乾,更加需要。

3.BB戒夜奶後會食糊仔,可加奶或骨湯,增強鈣質。