李思欣拍拖遊澳洲生蠔食上癮

李思欣在海邊漫步日光浴，范振鋒為她影靚相。

藝人李思欣與老公范振鋒（阿范）早前到澳洲旅行，平日二人忙於工作，難得抽到數天假期遂到澳洲一遊，坦言此行身心舒暢。今次是思欣第二次去悉尼，當年為無綫拍攝第一集《四葉草》外景時就去過開恩茲，她說：「嗰陣去拍嘢好大膽，因為劇中角色講我乜都肯制，仲要拍跳降傘鏡頭，好勁！依家要我再跳真係唔夠膽。」

漫步沙灘騷靚背

今次行程全由思欣安排，去了悉尼歌劇院、悉尼海港大橋及動物園等多個景點觀光，因當地天氣很好，夫婦倆於沙灘漫步，穿上露腿、露背裝的思欣乘機享受美好的陽光兼留倩影，她說：「當年拍《四葉草》時見到好多人裸曬，但今次見唔到喎！嗰度個泳池好大好靚，但係時間關係游唔到水，不過睇見都開心。」

李思欣	范振鋒喪食海鮮。	兩公婆在悉尼名勝打卡。

她又大讚當地美食：「我同老公其實都唔係咁鍾意食西餐，所以食咗好多餐日本嘢，啲海膽同生蠔都好好食，又新鮮又平，啲海膽原隻開，好鮮甜，啲人幾打幾打咁買生蠔，不過我哋食唔到咁多，但都上咗癮！」不說不知，阿范是「K王」，每次去旅行都會唱K，今次在澳洲也不例外，成為二人晚上的娛樂。