中環遭胸襲！伍淑怡車輪摑色狼
身材火辣的模特兒伍淑怡（YoYo）去年自爆被警員「抄牌」，對方更進一步要求交往，事後她到警署報案，投訴警察課將其指控歸類為「證明屬實」，最後該警員要接受「紀律覆檢」，事件暫時告一段落。不過「禍不單行」，她昨日在社交平台自爆遭非禮：「好耐冇試過大巴大巴咁打人，連我伍淑怡都夠膽非禮！」獲不少網民留言關心。
YoYo接受本報訪問時透露，前晚跟友人在中環閒逛，身穿普通Tee並不性感，但突然被一名年約20多至30歲、身穿白Tee牛仔褲的男士胸襲非禮：「個男仔無啦啦行過我身邊就揸我個胸，好明顯係有心！跟住佢好快閃走，我見佢去咗廁所，就同朋友一齊走入男廁搵佢，我一邊大聲話佢非禮，跟住一巴一巴打佢！（佢有冇道歉？）佢開頭唔認o架！後嚟先講對唔住，話玩吓！我話抽水可以當玩咩？我打完佢之後，佢就向我道歉。（有冇報警？）冇報警，都打咗佢。」