王宗堯鄧健泓鬥快造人

由林雪、鄧健泓及王宗堯主演的原創劇《向西聞記》單元《碌架床》,描述一家六口在兩房的三百呎公屋「困獸鬥」,大佬鄧健泓及細佬王宗堯為爭房吵大鑊,老竇林雪睇到眼火爆,爆粗狂剷:「邊X個生個孫畀我,間屋就畀邊個!」兩兄弟一聽完即刻各自捉住老婆石詠莉及蔡明思(Jessica)入房進行造人大計。餘怒未消的林雪繼續爆粗:「日頭唔好做呀,日頭中嗰啲,生出嚟嗰啲黑色o架!」

宣傳片大受歡迎,逾50萬點擊,網民狂讚林雪爆粗好笑,夠晒港式地道又有喜感,其「黑白BB生仔論」原來是即場爆肚:「做戲就係做緊生活,就係因為一家人,愛之深責之切嘛!」