點討女神歡心？杜小喬最憎男仔冇風度

向來粉絲眾多的網絡女神杜小喬，有樣有內涵，難怪深得不少男士喜歡。日前她現身東網節目《娛場》，與主持人禮賢同學分享約會時要注意的地方，更指細心和風度是男生必備的條件。

當中小喬指每次與男方約會，都會留意對方是否夠細心和風度，她說：「好似佢識得預先訂枱、拉櫈同埋叫嘢食時會問我食咩，又會主動夾嘢食畀我，都會加分。」

食嘢冇儀態扣分

小喬又自爆最討厭男方吃東西時沒有儀態及要女生扲荷包：「如果同個男仔第一次食飯，食嘢都已經咁冇儀態，我就會諗之後會更加差。同埋我覺得男仔要有風度，埋單時唔應該要女方畀錢，或者每人請一餐都可以。」