吳業坤扭計唔唱K歌 放風搵大水喉

「人氣王」坤坤將於本月19號假紅館舉行一場個唱，和近萬歌迷補祝其18號的29歲生日，他曾表示：「明年就30歲，有強烈感覺開始踏入人生另一個階段，不論在音樂上、演藝事業上都應該邁向新方向！」故把今個騷命名為「小句號」。原來「小句號」並非只是名號，有傳他密謀轉會，欲離開捧紅他成「新人王」及得「我最喜愛的男歌手」的星娛樂唱片！

有指坤坤為物色擁更強勁資金的唱片「後台」，助事業再上一層樓，其無綫經理人過去半年密密接觸多間國際性及大規模的唱片公司，坤坤又親自四出放風，甚至現身馬場捧「朋友場」博成事。只是由於其經理人合約是屬於無綫一方，坤坤只能賣歌手約，未能全權主導坤坤的「行使權」，令各大唱片公司在商業考慮下，至今仍未給他「好消息」。

吳業坤積極為個唱綵排練舞。	開騷之餘，坤坤忙與龔嘉欣合拍無綫新劇《大醬園》。	坤坤笑言公司好多Friend，田蕊妮就是其一。

索求更多自由度

據聞坤坤有意離開四年來合作無間的唱片公司，皆因其心態有變，近年幾，唱片公司屢勸他再唱如《原來他不夠愛我》這類大熱K歌，可是他嫌商業味濃而另有意見；加上他自覺音樂創作上應獲更大資源及更多創新嘗試，故即使去年唱片公司以開第二次紅館騷及優厚條件作利誘，坤坤至今仍拖足半年未動筆續約，甚至演唱會開騷在即亦未改初衷，情況罕見！據聞星娛樂作最後努力，縱使未簽約仍落力為坤坤搞演唱會，以十足誠意作挽留。

坤坤接受電話訪問時，被問到與唱片公司的合約是否快屆滿？以往有問必答的他，支吾以對說：「嗯……唔方便透露。（做得唔開心？）冇，大家都好努力為我搞今次演唱會。（傳經理人物色新公司？）我呢排Focus喺演唱會，冇去溝通，每日都排舞、練歌、做Gym、練跑，仲有拍劇，體力上辛苦，但心態決定一切，冇乜事。（傳你向其他唱片公司放聲氣？）我冇呢方面Contact，我係無綫Management會難啲。」至於和星娛樂續約成數，他說：「如果冇乜大問題都會留低，因為好多Friend喺度。」說到是否不想再唱K歌？他沒否認：「想試唔同類型嘅歌，想知市場反應，無奈大家都係鍾意啲情歌。」

認有意見分歧

至於星娛樂執行董事Tommy Chu，昨日受訪時承認坤坤尚未續約：「坤坤就好似中學生咁，如果佢想去外國升學，公司都會繼續支持佢。」又指坤坤的合約在今年內才屆滿，有共識待完了演唱會再傾。他則未聞坤坤及其經理人接觸其他公司，不過就算有接觸行內人亦屬正常。至於和坤坤的關係會否名副其實畫上「小句號」？他則說：「有信心同佢續約，雖然大家曾有『小意見』，但都係小事。」