林耀聲炒散維生誓要彈出
藝人林耀聲入行超過十年，曾經歷窮到無錢撳的日子，入行後不理父母反對，不斷靠打散工維生。為了追夢，就算窮到燶，仍然堅持到底。今年踏入30歲的他，終於捱到出頭天，給自己一個交代。
林耀聲為了動作片新作《入鐵籠》搏命演出，開拍前一個半月谷肌增磅至135磅，每日過着拳手般的生活，進行密集式的地獄訓練。他直言特訓期間每天都有放棄的念頭，但感謝女友張沛樂（沙律）相伴做運動，讓過程並不孤單。今年正式踏入三字頭的他，表示該電影是送給自己30歲的紀念：「電影係流芳百世，將來可以同子孫講，你老竇曾經都威過o架！」
唔敢同人講係演員
憑靚仔外形17歲入行的林耀聲，原來背後歷盡財困辛酸，他自爆入行後曾做過近三十份散工維持生計，例如跟車、地盤、送貨等勞力性工作。但他咬緊牙關，堅持邊拍戲邊打散工，他坦言當時其銀行戶口一百蚊都冇：「銀行戶口係撳唔出錢，屋企人當然想我搵份穩定長工，因為散工手停口停，但唔會有一份長工可以畀我成日請假去拍戲！當時唔敢同鄰居講自己係演員，甚至有一段時間拒絕同屋企人溝通，因為我知道一講到工作，佢哋就會叫我放棄。之後機緣巧合，有一次表演，我膽粗粗邀請爹哋媽咪嚟，佢哋睇完終於明白我對演戲有幾熱愛！」
感情穩定未想娶沙律
感情方面，他跟沙律拍拖近三年，感情穩定，但現階段以事業為重的他，暫時未有結婚打算。他在戲中好戰如猛獸，但女友卻形容他私下是個宅男，他亦承認：「我冇咩必要都唔會出街，反而出街覺得好嘈，想快啲返屋企。」
鳴謝：Barry@relaxdearhk
場地：明記潮館