張紋嘉異能感應撻訂避凶宅
張紋嘉在外獨居9年，大膽的她不怕鬼，又自爆直覺特別敏銳，有次曾急着搬屋，但覺得新屋環境不舒服，故後來忍痛撻訂，直至兩星期後該幢大廈竟有人跳樓，令她大呼好彩走得快！
歌手張紋嘉（Crystal）簽了新公司後再次投入音樂工作，推出新歌《獨立單位》，講述一個女生獨居的經歷，坦言亦是自己心聲：「一個人住差唔多9年，係好好嘅成長經歷。」
直覺敏銳的她分享特別經歷，事緣有次被業主迫遷，要在一個月內搬走：「睇咗有間價錢同呎數都OK，環境唔差，但其實唔係好舒服，唔光猛同舊，但我驚如果我再唔扑槌就冇地方住，於是就落咗一個月訂，但之後兩三日都囉囉攣，一住就要住成年，係咪真係要住？後尾好勇敢咁撻訂，搬返屋企先再慢慢搵，直到兩個星期後，有單新聞講嗰幢大廈有人跳樓，好彩冇租咋！」
裝蚊網防小強
Crystal坦言一個人住最驚是蛇蟲鼠蟻，笑言：「幫啲壁虎改名，仲要特登改啲男人名好似有安全感啲，我通常都唔會理佢哋，但曱甴就唔得，一定要打死佢。（自己打？）唔係，要叫人嚟，但依家我已經識得點防止曱甴入屋，就係喺個窗裝個蚊網。」
提到她現時與圈外男友蜜運中，問到可有意同居？她坦言想繼續獨居：「因為我幾需要自己空間，之前都試過同居，但唔係我鍾意嘅Style，一係就結婚，好Sure呢個人係可以同你生活，否則呢刻真係冇諗過同居。」
講到有人說如果想結婚要先同居試婚，她表示：「都要睇吓兩個人嘅生活習慣，要磨合，依家男友見到我屋企有啲亂都會問點解咁亂，因為我個人冇乜手尾。（驚同居吵架？）都係，我已經好耐冇試過同居，唔知會係點，所以唔敢。」
婆婆催結婚
講到她相隔多年再拍拖，問到父母是否很開心？她笑言：「冇喎，佢哋好冷淡，反而婆婆會催我結婚，但爹哋媽咪向來覺得工作、拍拖都係我自己嘅人生，除咗一樣嘢一定要我做，就係大學畢業。」但她表示因拍拖不久，故未想結婚一事，覺得太遙遠。
服裝：bread n butter 化妝：Circle
髮型：Jamie Lee @ JamieLeeHair
場地：openground.