姜皓文預咗陪跑買周潤發Win
藝人姜皓文憑跨性別角色首度入圍今屆金像獎影帝候選名單，面對四位影帝勁敵，他笑言有份陪跑已覺榮幸，更買重久違頒獎禮的周潤發稱帝。回想當日得知有份入圍，他興奮得於酒店房翻了兩個觔斗！
平日Man爆的姜皓文（黑仔）於電影《翠絲》演跨性別人士，不乏扮女人戲份，絕對是他從影以來最大挑戰。成功提名今屆金像獎影帝，認真威水。
「放埋一齊要還神」
黑仔表示看過對手的入圍作品，對周潤發的《無雙》情有獨鍾：「其實都唔使睇，呢個陣容千年唔逢一潤，發哥幾耐冇喺金像獎名單度？我有幸放埋一齊已經要還神，幾神奇！啲人話我陪跑，我覺得係榮幸。今次發哥演繹型好多，淨係體力都值回票價，角色好搶，買重佢贏！」
他自爆宣布入圍名單當日於內地拍戲，收工後即趕回酒店睇直播，得悉自己有份入圍，即於床上興奮翻斛斗：「套戲有9個提名得來不易，重點係由古生（古天樂）口中讀出嚟，相信佢心入面都有暗湧，因為呢個角色係佢叫我演，話劇本好叫我試，其實我推過一次，因為要做女人。」
時男時女情緒不穩
黑仔坦言拍攝前要調整心理關口，並與一班跨性別人士見面，了解他們的內心世界：「其實心態上最難演，因為聲線問題，平日會輕聲講嘢，有時連叫落車都唔敢，個心好『噏」！記得拍嗰陣時男時女，情緒唔好搞到脾氣差，拍完會無啦啦發脾氣，喺條街度冇原因喊一輪，癲癲哋。不過呢個都係我演藝路上一個印記，開心遇到呢個角色。」
服裝：Degaia_HK