區瑞強開騷注新血 陳煒張慧儀處女獻聲
資深歌手區瑞強（Albert）向Fans報到開騷！風雨不改遵守承諾每年與Fans一聚，出名計仔多的他今年特別點名陳煒、張慧儀處女獻唱，爆出新火花令大家耳目一新 ！
一連三場的《區瑞強名曲巨星真經典演唱會2019》將於5月3至5日假伊利沙伯體育館舉行，每次開騷他都碌盡人情卡搵朋友獻聲撐場，除了有「鐵腳」陳百祥、曾志偉、胡楓等，今次有新血加入，邀得陳煒及張慧儀擔任嘉賓，給Fans驚喜︰「張人情卡真係碌到爆，冇得還(口架)！我鍾意搵啲少唱歌嘅人，就好似陳煒同張慧儀，兩個都話好大壓力，不過叫得佢哋上台就會畀晒意見、幫佢哋揀好晒歌先上台。」
舞台上做番自己
Albert特別欣賞陳煒兩年前在無綫節目《我愛EYT》中谷胸扮梅艷芳（梅姐）唱《烈焰紅唇》，入型入格，震懾全場︰「離遠睇好鬼似！好有梅姐個神髓，後來先知佢有興趣唱歌。（佢會唱番梅姐啲歌？）未必，佢做番自己，叫得佢嚟就唔係要佢將平時啲表演、登台伎倆帶過嚟，想帶個好朋友同觀眾聚會。」
互動環節冇悶場
至於與張慧儀的緣分，Albert指大家有共同朋友，相識已久，平日有一齊唱K聯誼︰「知道佢唱得兩嘴，到時會有合唱同獨唱，可以畀佢獨自享受舞台個感覺。」他大讚慧儀身兼父母職責，獨力湊大患有先天性心臟病的兒子︰「唔係因為佢唱歌叻、人又紅而搵佢，係見到佢喺社會工作方面好有心，就主動邀請佢，我要做慈善，今次個騷同咗七個NGO（非牟利組織）合作。」
今次開騷像往年一樣與Fans有互動，Fans會拿到兩支不同色的星星螢光棒，到時投票選出他要唱的歌，他說：「大家一齊鬥舉，兩隻手舉晒就兩首都唱，好好玩，絕無悶場！」