胡鴻鈞自誇勁過林峯囂爆遭「雪藏」
歌手胡鴻鈞兩年前因角色「石敢當」成功出位，歌曲《到此一遊》更唱到街知巷聞，據聞他以為坐穩「星夢一哥」張櫈，囂張到爆，更自詡勁過林峯，結果觸怒唱片公司老闆何哲圖，親手斷送唱金曲的黃金機會，更遭「雪藏」懲罰，歌唱「錢」途危在旦夕。
2010年參加無綫歌唱選秀節目《超級巨聲2》出道的胡鴻鈞（Hubert），簽約星夢後發展平平，雖然被讚是靚聲王，但聲勢、人氣一直不及當時同公司的許廷鏗及鄭俊弘，直至2017年參演劇集《降魔的》飾演「石敢當」，人氣急升，連帶獻唱的主題曲《到此一遊》爆紅，更奪得「最受歡迎劇集歌曲」。
擔正男一 恃寵生驕
Hubert彈起上位之際，正值許廷鏗決意離巢玩跳槽，而鄭俊弘則被爆背未婚妻暗撻何雁詩，乖仔形象毀於一旦，Hubert終被點名力捧坐上「星夢一哥」位置，更獲無綫委以重任，擔正劇集《救妻同學會》男主角。不過盛傳「紅」心壯志的他即恃寵生驕，由以往靜如鵪鶉，激進得變成目中無人，即使有「男神」周柏豪加盟星夢，又有「Chok王」林峯回歸與星夢合作《使徒行者3》主題曲，但Hubert自視甚高，曾經大口氣自詡勁過林峯，最終因為態度囂張而闖禍，被星夢掟入「雪櫃」。
有知情人士爆料，無綫正在熱播的重頭劇《鐵探》，主題曲《鐵石心腸》本來屬意Hubert主唱，但因他自以為是得罪人，結果白白錯失唱金曲的機會，令鄭俊弘冷手執個熱煎堆，憑這首大熱作品「鹹魚翻生」。Hubert雖然正拍攝新劇《降魔的2.0》，但有指其歌唱事業處於「悠長假期」，今年不但未有新歌派台，連《降》劇的劇集歌都未必有得唱。
鄭俊弘執雞 純粹把聲啱
對於Hubert因囂爆而錯過《鐵探》主題曲，星夢CEO何哲圖（Herman）昨日說：「純粹因為鄭俊弘把聲啱唱，主題曲嘅嘢我哋係揀把聲啱唔啱。」對於盛傳Hubert曾對人認叻自誇勁過林峯，Herman哈哈大笑：「哈哈……（傳佢得罪你？）冇得罪咩呀！（咁佢有冇講自己勁過林峯？）其實藝人點睇自己，我係唔了解，佢哋點睇自己嘅位置，我好難Comment。（話雪藏佢？）冇，佢仲拍緊《降魔的2.0》」