72歲羅家英細菌感染高燒入院

藝人羅家英2005年曾患肝癌，日前突然傳出他入院消息，據知留院期間他嘆謂人生無常，回覆朋友：「不到99，誰也不許走。」又滿懷感慨地叫大家保重，令朋友擔心不已。

引發膀胱炎腎炎

記者昨日聯絡正留院治療的羅家英，他透露3月中接受前列腺檢查，並要做一個穿刺手術，手術後未完全康復便返橫店為有份投資、擔演主角的網絡電影《心願清單》開工，期間發冷發熱被送往當地醫院，但他仍抱恙開工，至日前才返港就醫，結果發現膀胱和腎發炎。

他形容今次「可大可小」，受訪時說：「今日精神好啲，之前迷迷糊糊。（病住都開工？）我做男一，加上大堆人等住我開工，唔想阻礙拍攝，我哋呢行就係咁，得閒死唔得閒病，咪邊拍邊入院睇住！（老婆汪明荃擔心？）係咁哦我囉！但都冇用(口架)，後來咪冇出聲！（做前列腺檢查係因為有事？）係男人都有嘅問題！原本冇大問題，之前檢驗後話要攞細胞檢查，做穿刺（手術）先攞到，點知細菌感染，當時喺橫店拍嘢時發冷，又燒到41℃，要做全身檢查，一星期都要住院，期間要吊有藥物成分嘅鹽水，後來好啲就出院為個戲埋尾，拍完就返嚟香港，依家入咗醫院治療，食抗生素，冇乜嘢，大家放心！」

汪明荃被嚇親

而汪明荃昨晚為節目《娛樂大家》錄影時接受訪問，她指羅家英都幾辛苦，醫院、拍攝場地兩邊走：「依家已退燒，早兩日燒到40℃，我都幾驚，希望佢休息好啲。（前列腺問題有結果未？）都要等報告，暫時未有。」

另外，羅家英的契女楊玉梅前日往探望他，並在社交網上載合照及祝他早日康復，相中羅家英以一身醫院病人裝束上鏡，亦有戴帽、口罩及領巾保暖，精神不俗。

刺十多針 抽細胞檢查

前列腺穿刺活組織檢查是用作診斷前列腺癌，進行該手術前需以抽血方式檢驗血液，若前列腺異抗原血液測試水平（PSA值）超過4以上，便會建議作穿刺檢查。該手術利用前列腺經肛門於直腸壁穿刺組織，刺十多針抽取前列腺細胞進行化驗。

泌尿科專科醫生陳龍威表示：「該手術存在一定風險，過程可能會引起某些併發症，包括肛門、小便及精液帶血，甚至會有細菌感染，亦有可能導致小便困難。其實以上的併發症，跟穿刺手術做得好與否是沒有直接關係。」