翁虹忍氣嗌輸場交贏咗頭家

1989年選亞姐奪冠入行的翁虹，演藝生涯從無停過手，笑言即使佗着女兒時仍有出書，但今年選擇多留港，可以多見年邁父母。她早前為東網巨星節目「海馬牌床褥特約」《閨蜜睡房》擔任嘉賓，一連三集與主持俞詠文（Angela）大談事業與婚姻。

「想個女有好榜樣」

經常在社交網放閃晒一家三口溫馨照的翁虹，被問到如何經營這段婚姻，她笑說：「其實每次嘈交，我都會諗：『我梗係盲咗，做乜嘢要嫁畀你！』當然諗法係一閃即逝。」處女座的她自言已經進化：「我同先生好多時為雞毛蒜皮嘅事嘈，係大家原則唔同，但我自細喺一個嘈交嘅環境長大，爸爸媽媽三日一小吵、四日一大吵，所以同自己講將來有家庭，盡量唔想有嘈交。同埋想個女有好榜樣，永遠都係閂埋門先『中美大戰』。（邊個Say Sorry先？）我！我哋女人唔淨係胸大，係要胸襟好大，忍一時風平浪靜，港女好少咁樣諗，但我係經過改良，悟出嚟嘅。」話雖如此，她表示老公其實非常愛護家庭，又時刻提醒她做好身教，讓女兒感受到父母的愛，才可以分享愛、去愛人。

提到事業，翁虹依然有股衝勁，現階段拍戲要求質素，笑言重溫昔日作品會有遺憾：「如果畀我再拍多次，一定會更加好。」想了解更多翁虹的內心世界，記得本周五、六、日收睇《閨蜜睡房》！