朱晨麗飛身救人腳傷頸歪
朱晨麗趕拍新劇時禍不單行，先甩骹再撞傷小腿，還發現頸椎嚴重移位！雖然已接受治療，但日夜趕戲的她未有時間覆診，只能靠意志力撐住。
無綫花旦朱晨麗（朱朱）最近同時拍攝新劇《法證先鋒IV》及《大醬園》，有不少動作戲的她日前發現手肘劇痛，原來觸傷舊患甩骹！最慘的是忍痛參與《法》劇一場天台救人戲時，一個飛身動作撞瘀小腿「上五吋下五吋」，傷上加傷。
事後，朱朱表示手肘甩骹後往接受治療，醫師又發現其頸椎嚴重移位：「問我係咪撞過車！佢好奇怪話冇撞車嘅話點可以歪成咁？最後幫我針灸同啪骨復位，但我只係睇到一次醫生，連覆診都冇時間，患處仲隱隱作痛！依家忙緊拍《大醬園》，希望呢一、兩日可以再抽空覆診。」
危站39樓天台 凍到震
講到今次危站39層樓、飛身撲救僅穿Bra的企跳女子，鏡頭前型到爆，但其實畏高的朱朱除了要克服恐懼外，當日還突然轉冷吹強風，凍到腳震震，她說：「其實真係好驚o架！無遮無擋企到咁高，風力又大，仲要喺圍邊衝過去救人！雖然有威吔但都真係腳軟，係咁叫自己唔好向下望，集中精神拍攝，不斷叫自己克服，好彩只係NG幾次就搞掂，我都幾滿意呢場戲。」