傅穎着貼身裙冇啖好食

早前出席完紐約時裝周的傅穎,應內地媒體邀請與韓國出生的內地組合「至上勵合」成員金恩聖到首爾出席時裝周。傅穎出席了兩個大騷,分別穿上兩個時裝設計師的服裝:「其中一條裙超窄,工作人員係咁提我唔好再食嘢,驚我着唔落條裙。」平日不節食的她,騷前一晚要餓住瞓覺,翌日怕肚脹只食一塊餅、喝一杯咖啡,所以一完騷即時放肆去食大餐!

剪了一頭短髮的她是為了內地一部新片演警察,她笑說:「最搞笑之前去同學婚宴,佢哋話我同中六嘅髮型一樣喎。」