祖兒瘋行東京快閃影海報

容祖兒將於8月在紅館舉行《PRETTY CRAZY容祖兒演唱會》，十二場門票即將作優先訂購，早前她飛往東京為演唱會拍攝宣傳海報，非常切合演唱會主題，「Crazy」（瘋狂）地用24小時努力超額完成。她表示「PRETTY CRAZY」是好友黃偉文（Wyman）的構思：「呢廿年來無論喺工作同經歷上，呢兩個字都幾貼切，Wyman真係勁。」

每套衫襯埋指甲色

今次演唱會海報，她找回20歲首次開紅館騷時合作過的攝影師Leslie Kee（紀嘉良）操刀，她指這個合作有齊演唱會主題元素：「同佢傾咗半小時定好咗，我就用咗一日飛去東京，24小時內完成海報，影咗超過12個鐘，一落機就去影相，影完即上機走，所有衫同形象設計由Leslie一手包辦，佢細緻到每套衫都要我換埋指甲襯色，影咗好多套衫，淨係揀相都揀咗好耐，真係幾Crazy。」

Keep住體力唔太瘦

今次是她第十個紅館騷，雖然還有幾個月才開騷，但已積極準備保持最佳狀態：「我要唱最好嘅歌，跳最正嘅舞畀大家睇。累積多年經驗，發覺做演唱會最緊要係體力同健康，唔好太瘦，否則冇營養，唔夠抵抗力去戰鬥，所以Keep弗同調理身體會同步進行，唔會畀自己病。」她跟團隊會製作一個前所未有的演唱會，讓大家看到她廿年來的進步！為了紀念，她特別請人設計了一個代表的標誌，內有JY20字樣，砌成了她最愛的鬱金香，而演唱會推出的紀念品，也會有這個標誌圖案。