胡定欣操弗Body預告超性感

「視后」胡定欣首次拍電影即獲提名。

「胡說八道會」成員胡定欣、黃智雯、李施嬅及胡蓓蔚前晚錄影無綫節目《娛樂大家》，被讚身材更勝從前的定欣開心說：「肌肉比例較拍《城寨英雄》時更強，呢排放假多咗時間操嘛。（上咗癮？）係，自我滿足囉，都要裝備自己。」自言掛住開工的她說：「1年冇拍，只係劇集延遲咗，本來話5月拍，依家又話7月。（續約問題？）唔係呀，合約仲有一段時間。」又稱今次放假是入行以來最長一次：「好事嚟，可以整理心靈同一啲想法，享受吓生活。」

投自己一票

獲提名金像獎「最佳新演員」的定欣，被問是否已準備戰衣？她笑言未揀啱：「一定騷body同線條，畀驚喜大家，因為參加新party，要行出第一步。」昨日她到電台接受薛家燕訪問時表示，很期待出席盛會：「以前只係去過無綫嘅頒獎禮，我首次拍電影就有提名，已經係大豐收。」並自爆投了自己一票，感覺新鮮。

黃智雯水着密實

至於黃智雯表示首次與「胡說八道會」好姊妹亮相遊戲節目，自認轉數慢的她笑言：「預咗畀人玩！」提到拍攝《降魔的2.0》，她說：「遲啲可能要性感演出，我睇咗分場，好似有場泳衣戲。（三點式？）我可以着件包到上頸嘅，或者密實少少，走型格路線。（男友唔畀？）唔會，拍戲佢唔過問，最緊要係角色、劇情需要。（操弗啲？）我呢排開始做運動，想健康啲同排吓毒，唔似定欣操得咁勁。」

黃智雯（左起）、李施嬅、胡定欣及胡蓓蔚姊妹情深。

黃智雯自認轉數慢，預咗玩遊戲會輸。