陳家樂「眼紅」陳瀅搵錢多

陳家樂、姜麗文及林盛斌等昨日現身電視城錄影《兄弟幫》，家樂主演的新劇《廉政行動 2019》即將推出，他說：「台前幕後合作得好愉快，煞科之後想約飯敍，但一直夾唔到期，好似我即刻去咗內地拍電影，陳瀅就喺緬甸探訪未返。我哋依家有個夢想，就係劇集播到第5集可以約到，我哋就出動抽獎引誘大家參加，陳瀅話可以拎5位數出嚟。（佢供樓好窮喎！）你哋睇吓佢社交平台啲廣告先啦，我唔明點解大家拍埋同一套劇，佢工作多過我接到嘅咁多！」

鄭俊弘「閃」過同姜麗文打招呼

另外，姜麗文近日被傳拍拖，她大方承認：「都拍咗兩年喇，男友叫Pakho，佢係位工程師。（當初點識？）朋友介紹，我話要鍾意運動同動物嘅男仔，第一次見面似足正式相睇，有啲尷尬。」

今次踢爆自己蜜運，原來只因早前與男友參加內地綜藝節目錄影：「我哋上咗《女兒們的男朋友》，節目安排爸爸坐喺電視機前睇我拍拖，而我拍拖會Sweet嘅，要錫錫同攬攬。（唔怕爸爸呷醋？）或者佢內心有少少o架，不過佢都鍾意我男友嘅，咁我都34歲啦，佢要接受o架喇！」期間，她的舊愛鄭俊弘剛巧路過，但「一閃即逝」，對此，同場的林盛斌說：「佢係嚟搵我助手，但我有見佢同姜麗文打招呼，冇嘢喎！」