孫耀威驚陳美詩出軌

孫耀威（Eric）前晚憑新歌《圓》在《第六屆微電影『創+作』支援計劃（音樂篇）頒獎典禮》中奪「最佳微電影男主角（專業組）」金獎。他形容愛似一個圓圈，有開始冇終點，昔日會追求轟轟烈烈的愛情，但年紀大就追求細水長流。提到過幾日是他與太太陳美詩拍拖10周年，他表示早前到歐洲旅行補度蜜月：「愛情係要畀大家新鮮感，我哋仲喺圓圈入面跑緊，希望唔會出軌啦，我已經係絕緣體，驚佢啫！」他指歐洲之旅未有造人成功：「我哋有講呢個話題。（講係冇用要做！）之前真係好忙，有時又撞啱佢唔方便日子，希望嚟緊多啲見。」問到太太可會考慮雪卵？他覺得做法不浪漫。