擁41吋長腿冇人信！惠英紅獎座「啄」面 瘀爆
影后惠英紅前晚及昨日分別現身時裝活動及接受電台訪問，提到日前獲得亞洲電影大獎最佳女配角後即時「找數」，在社交網站上載索爆三點式照，她自稱擁有41吋長腿：「雖然我唔高，但（身材）比例好長，對腳有41吋，啲人成日都唔信我。（真人不露相？）唔係，大家後生少少時都睇過我嘅寫真。」
木製金像獎全港獨有
另外，她又自爆瘀事，日前將多年來的獎座放入櫃時誤傷粉臉：「我一時拎唔穩，個獎跌咗落嚟，好在接得住，但個獎就啄咗我塊面一下，第二日起身發現塊面變咗紫黑色。」她透露近10年來共獲30至40個獎項，但10年前的獎座大多已經不見了，只剩下第一屆的香港電影金像獎仍在：「嗰屆只係頒咗5個獎，其他得獎者嘅獎座都唔見咗，得番我有，個獎係木造，之前都借過出嚟影相，佢哋仲幫我修復番。（有冇諗過開展覽？）冇，我百年歸老都係將啲獎放電影博物館。」