杜汶澤自揭不舉 想趷高頭唔容易！

阿澤日前載索女返家斷正，即時方寸大亂，更爆粗斥責女伴。

現年46歲、有出軌前科的杜汶澤，日前趁太太田蕊妮離港工作，即做「柴可夫」親自接送長髮女伴返大埔寓所夜會，當場被本報斷正好事後，他表現慌亂、尷尬又狼狽，粗口夾雜向女伴落Order：「你咪X耷低個頭呀！」更立刻在社交網上載女伴與朋友們在家中開P的相片解圍！

搵靚仔益老婆

昨日杜汶澤出席ViuTV全新節目《走佬去馬拉》發布會，被問到帶女返歸一事曝光後，田蕊妮聲稱也要「效法」帶男人返家，而且會「趷高個頭」！怎料杜汶澤竟揚言「年紀大機器壞」，更自揭「男人最痛」來證明出軌不易，他說：「咁啱啦！我介紹啲馬拉靚仔畀佢，大家打成平手。（有冇同太太面對面再解釋？）佢笑我個Friend耷低頭，咁突然之間有人衝出嚟，我都驚！我得罪咁多人，點知會唔會有人想殺我。（你唔會出軌做對唔住老婆嘅嘢？）我呢個年紀都唔得o架啦！想趷高頭唔容易，真係有苦自己知。」

我呢個年紀都唔得o架啦！ 為向老婆派定心丸，阿澤昨日不惜自揭「男人最痛」。

關乎我「性福」o架！咪周圍唱啦衰佬！ 究竟阿澤得唔得？要問過田蕊妮至知喇！

談及節目在馬來西亞拍攝，杜汶澤直豎拇指大讚當地是移民的好地方：「我諗住喺當地買塊地，可以起8千呎嘅屋，都係百幾萬，加埋起屋同裝修400萬就得。我喺香港做一世，都買唔起8千呎嘅屋！」