阿Sa衝擊影后 一人擔正三部戲演技大爆發
藝人蔡卓妍（阿Sa）憑英皇電影《非分熟女》入圍今年金像獎影后，演藝成績有目共睹，今年她將更上層樓，變身千面女郎，一口氣接拍了三部不同題材的電影，當中包括《神探大戰》、《感動她77次》、《給我1天》，演技大爆發！
阿Sa昨日以亮麗露背服裝現身，與三片的男主角劉青雲、林峯、周柏豪、王祖藍等接受訪問，談到電影《感動她77次》是《原諒他77次》續集，問有否票房壓力？她說：「冇呀！上次出乎意料地好，應該有儲備基金，有底氣！」講到一連串演繹多個角色，最喜歡哪一個？她說特別期待《感》片及《神》片，而拍《神》片時更陷死亡邊緣：「有場戲個頭要包實保鮮紙，不過好傷心，做得咁辛苦，大家都問嗰個係咪我！（你話係死亡邊緣？）係呀！本身包咗兩個圈，拮咗個窿抖氣，但近鏡時，導演話睇到，要封埋佢，抖唔到氣真係差啲死！」
而《神》片男主角劉青雲亦在台上表示跟導演韋家輝合作「唔講得笑」，他說：「最大挑戰唔係拍嗰陣，係接嗰陣，接咗之後就開始後悔，好清楚拍佢嘅戲會遇到咩情況，但之後發現我真係好適合拍呢啲戲，預計嘅事情都有發生，詳情就唔呢度講喇！」