闖「沙士」區病人為鄰陳煒驚歷生死

「熄機」前的亞視，人才輩出，多位藝員過檔無綫後亦有不俗成績，雖然人在無綫，但他們仍懷有念舊之情，經常與一班「亞視友」敍舊，其中1996年亞姐冠軍陳煒、「六合彩之子」蔡國威與已嫁作少奶奶的1995年亞姐季軍黎思嘉「話當年」有感而發，不勝唏噓。

有工開唔敢埋怨

當年是「亞視一姐」的陳煒，當選亞姐後拍過不少劇集，可惜遇上2003年「沙士」，令整個娛樂圈甚至香港都冇啖好食，惟有與其他同台演員到內地「開工」，拍攝內地劇《俠膽醫神》。不過，當時內地已被病毒恐慌籠罩着，人心惶惶，而拍攝場地懷柔的鄰村「小康山」，原本收容精神病人之地，改為供沙士病人暫住，陳煒與有份參演的老友黎思嘉，只好互相照應，幸好思想正面的她未有抱怨：「有工開總好過冇工開，人人冇啖好食，我哋都算有得拍，都唔敢怨。嗰時係夏天，上去開工咪盡量做足防病措施，買咗好多消毒藥水、洗手液同口罩！」幸好的是，當地環境並非兩人事前所想像般差，還有機會呼吸大自然空氣，品嘗很多農村餸菜，鄉村生活總算寫意。

弱台藝人一條心，陳煒、蔡國威與黎思嘉現時雖各有各忙，但仍不時相約敍舊話當年。

黎思嘉

黎思嘉低調嫁人做少奶奶

儘管毗鄰是「沙士村」，陳煒與劇組人員慶幸未有遇上「疫情爆發」，故這次原以為是「苦差」，卻有另一種新生活體驗，她倆對此印象猶新，黎思嘉說：「人在異鄉，最緊要團結，呢個亦都係我哋亞視精神！亞視係弱台，裏面嘅演員會更加齊心！」如今眼見老友陳煒在無綫上位至「女一」，亦戥其安慰，而這位亞姐季軍自2003年低調嫁人做少奶奶後，淡出娛樂圈相夫教子，最近更隨夫移居到馬來西亞。

蔡國威整餅「逃生」反拖後腿

遇上這兩位捱得的「亞姐」，「六合彩之子」蔡國威都要豎起拇指讚兩人「叻女」！相比自己，他在亞視「熄機」後翌月便過檔無綫亦有不俗發展，除了繼續擔任「六合彩」主持外，還有不少機會拍劇，可惜太忙關係，未能兼顧自家曲奇樓上舖，需搵合夥人轉型，威威說：「始終離開亞視一刻，要搵定一條後路。點知過檔後，公司真係畀咗好多機會我，所以令我好矛盾，因為開工令我唔可以兼顧餅店生意，期間好大壓力，一度令我健康失衡，惟有搵人幫手！」

對餅店轉型，威威已有新構思，將樓上舖轉為地舖，賣餅之餘還設計成以片廠為題材的Cafe，概念獲陳煒與黎思嘉大力支持，他笑說：「如果轉型成功，到時我搵你兩位阿姐嚟剪綵，唔好收我咁貴就得！」