甄子丹落注上限$1,000
甄子丹曾當馬主，愛駒「宇宙車神」獲獎無數，惟已於去年退役，子丹明言養一匹良駒需身負重要責任，付出的愛心比金錢更為重要。即將在港開戲的他，希望可多陪伴家人，暫以工作及家庭為先，遲啲再諗做馬主！
「宇宙最強」甄子丹昨日偕太太汪詩詩和其表妹湛琪清（Jessica）現身沙田馬場出席2019《寶馬香港打吡大賽》，連續7年擔任打吡大使的子丹，表示會與太太一同下注，問到買幾多？他說：「會諗吓，會落1,000蚊，都係細細哋參與吓，我太太就會落注大啲。我眼光都OK，不過唔係淨係睇落注，仲眼光好揀到好太太！」其名下愛駒「宇宙車神」去年退役，暫時無意再做馬主，因他覺得養一匹良駒絕不簡單：「唔係話畀錢買就得，要畀關懷同愛心，仲要好多心血，我哋咁忙，驚冇咁嘅時間。」詩詩則認為做馬主需不時探望及給予支持，當「家人」一樣。
月底開拍警匪片
子丹如此支持馬術，會否讓小朋友學策騎？他直言策騎是個親子好活動，只要做足安全措施絕無問題：「凡係專業同激烈嘅運動都有機會危險，最緊要小心，同埋安全措施做得好，好似踢波會扭傷腳，我哋拍戲都會受傷，睇吓自己點Handle技術。」他指月底將開拍與陳木勝導演共同監製的警匪片，自言有份投資，不過主要由英皇集團主席楊受成出錢。
劉小慧激罕性感
同場出現的Jessica表示相當享受新婚生活，又大爆老公心急做老竇，想她生BB與小朋友一起學好中文。此外，藝人蘇志威與太太劉小慧及大女，亦有現身馬場撐愛駒「駿王」出賽，小慧更罕有晒事業線，認真吸睛！