霆鋒半裸拋上衣：件衫7星期冇洗
英皇歌手謝霆鋒現身戶外騷，與近萬人大唱多首金曲，場面哄動。霆鋒High爆除衫大騷4舊吸睛腹肌，型爆赤裸上身表演指功彈結他，惟他指兩個囝囝較為文靜，未有同行感受氣氛。
霆鋒昨日壓軸現身亞博舉行的戶外騷，與百人大樂隊一同演奏，同場還有樂隊RubberBand、Mr.、周國賢等14組表演單位，吸引近萬人入場。謝賢、狄波拉及老公鬍鬚Kong（江耀城）、經理人霍汶希等到場支持，謝賢更搞笑表示要上台唱歌，自誇天生孭起結他會型過兒子，而為力撐霆鋒，他不惜走入人群隊伍霸最佳位置睇騷！
戴黑超、着黑衫襯牛仔褲出場的霆鋒約晚上6時現身，全場即陷入瘋狂狀態，不斷尖叫，他帶來一段經典歌Medley包括《玉蝴蝶》及《壞習慣》等，Fans自動波大合唱。唱畢他先除下黑色外套，然後跟Fans打招呼，並多謝他們一直不離不棄。演唱新歌《塑造》時，霆鋒被氣氛感染High爆落台，更脫下黑色上衣拋向人群，大笑表示：「件衫成7個星期冇洗！」4舊腹肌盡現的他繼續赤裸上身、孭起結他大騷指功。最後霆鋒與由網上召集的百人大樂隊一同演繹兩首經典作《不要說謊》及《活著Viva》，進一步將氣氛推至最高點！
想盡快開紅館騷
霆鋒騷後受訪，講到今次開騷反應極佳，很想盡快開紅館騷，但自認嘈喧巴閉的他，表示首選都是戶外場地。提到雙親捧場，他表示開心：「係佢哋搵到飛。（頭先話件衫7星期冇洗？）講笑啫！（咁你有冇7個星期冇見對仔？）前日先見完。（做咩唔一齊去家長日？）有我哋自己安排。」問他為何不帶兒子來感受Rock爆氣氛？他笑說：「佢哋唔係偏Rock，文靜啲，好動同鍾意搖滾係兩件事。」當問到最近可有見前妻張栢芝？他即封口微笑搖頭。
另外，有份演出的Mr.及周國賢均表示想同霆鋒Jam歌，但周國賢笑說：「對上一次見佢真人已經係14年前，佢仲Keep得好好，驚同佢企埋會顯得老！」