林峯全方位啟動返娘家搞大佢！
藝人林峯相隔5年後強勢回歸「娘家」無綫，昨日舉行名為「Homecoming」記者會，並與星夢娛樂合作，歌影視全方位啟動，為林峯度身訂造「大Project」，其中之一是將開拍《使徒行者3》，為其事業再創新高「峯」。
林峯昨日在記者會上正式宣布回歸無綫，獲無綫高層杜之克、何哲圖及余詠珊現身支持。現場播出林峯過去在無綫演出的經典劇集及獲獎片段，大會更隆而重之送上金鑽TVBuddy、金咪及肥媽親自炮製的一壺鮮雞湯，相當窩心。難怪林峯在台上坦言重返「娘家」，令他心情很久未有如此激動過，難以用言語來形容，他更感謝杜之克和何哲圖，讓他將會有一個全新Project，而其中之一就是開拍《使徒行者3》兼演唱主題曲，令觀眾可在其出身地方（無綫）看到好作品。
明年開騷
林峯受訪時坦言離開無綫後，每當經過街上見到無綫的外景車甚至新聞車，都會上前看看可有認識的同事，很多幕前幕後的同事，都問他何時回來。問到是誰召喚他回巢？他坦言是杜之克：「機緣巧合下，杜生搵我，同我傾咗一個Project，我覺得好有興趣。至於Project係乜？詳情之後再公布。」
問到回歸拍劇還是計劃開演唱會？林峯表示：「有計劃喺2020年開演唱會，趁自己仲跳得唱得，你知我演唱會需要好大體力，都要開始儲新歌，今年會喺內地開巡唱，5月亦會喺澳門開，作為2020年個唱熱身。」
問到重返娘家目標可會是「視帝」？林峯坦言：「唔好嫌我老土，攞獎對我嚟講唔係最睇重嘅嘢，身為演員，寧願自己所演嘅角色令人記住，可以成功塑造更多角色。我係一個需要過戲癮嘅人，始終都拍咗20年戲，一直希望尋求突破同新嘗試。」問到是否想重奪「最受歡迎男歌星」獎？林峯猶豫一刻，莫非「唔想攞」？他笑言：「畀梗係要啦！（酬勞吸引？）呢個當然係其中一個條件，係友情價、回歸價，因為返娘家真係好開心，好掛住所有同事。」講到以往合作的女主角差不多嫁晒人，要和新一代女藝人合作？林峯表示等無綫安排，最緊要切合到Project角色。
避談婚訊
對於外界傳他結婚，林峯再次強調，若工作上的問題，大家「打橫問」都沒問題，但其他私人問題就不回應。他解釋以往覺得講少少都無傷大雅，但發覺就算只是一小部分都會被放大，甚至被蓋過，對花了不少心血製作一個作品的台前幕後很不公平，所以希望將視線轉回正軌。