張衞健未紅窮到連環被飛
現年54歲的藝人張衞健最近到學校向年輕人分享面對挫折的經驗，當中提到陷事業低谷時，女友均離他而去。他一開始笑言：「雖然演過韋小寶，但私底下嘅我喺愛情方面，好多時候都係扮演被分手嘅角色。」他自爆當年在泰國拍劇跌斷手，要入院做全身麻醉手術，醒番後當時的圈外女友劈頭第一句竟要與他分手，原因是不想嫁給他後，買個名牌手袋都要等半年。又提到另一女友嫌棄他冇錢而分手：「佢話我連自己同屋企都未養得起，如果同我結婚，點樣養我哋嘅家庭？」
遭父虐打 食飯靠賒數
講到童年，他透露在躁狂爸爸的虐打中成長，記得有次騎爸爸膊馬行街時，他向一架靚車吹口哨，但回家竟被爸爸打：「佢二話不說將我凌空拋落床，撳住我嚟打，撳到我幾乎窒息。佢亦會將我細佬打到皮開肉綻，我記得當年七、八歲時會諗幾時畀佢打死？」
回想起未紅歲月，他提到當年在TVB冇錢開飯，去公司餐廳食飯只能扮忘記帶銀包，餐廳老闆相信他有一天會還飯錢，8年後他終做到男主角，並還錢給老闆。
傷口痛不及心痛
記者致電張衞健，講到圈外女友手術後跟他分手，他坦言：「當時好愕然，佢咁樣同我講，我做完手術個傷口痛，但都唔及個心咁痛。（當時有冇諗過自殺？）冇，反而下定決心，第日搵女朋友唔可以咁注重物質。」至於另一圈內女友嗌分手，問是否江欣燕或宣萱？他說：「唔係佢兩位，呢兩位喺我冇乜信心時都畀支持我。（咁係邊個？）唔講，時間已過去，我做分享係希望畀正能量年輕人，特別近日有兩個學生自殺，想同佢哋講面對挫折唔好咁易放棄，咁樣先可以過到難關。」