秋生又攞獎：差個奧斯卡！

藝人黃秋生與曾美慧孜前晚在香港電影編劇家協會2019年春茗晚宴中，齊齊奪得「最佳角色演繹獎」，導演王家衛則獲頒「榮譽大獎」。秋生受訪時表示最近在日本拍廣告：「都仆到返來攞！（攞獎攞到手軟？）未！仲可以繼續。（攞埋金像獎？）有又唔拘，冇完美嘅，人生處處留遺憾，差個奧斯卡囉！」坦言最強對手是周潤發：「發哥喺度邊個敢攞！」此外，秋生昨日再有好消息，榮獲《第21屆烏甸尼遠東電影節》傑出成就金桑獎殊榮。