平日把口攣都拗直阿澤三答：點會答你吖！
杜汶澤趁老婆田蕊妮離港，夜會長髮女斷到正一正，愛妻號個金漆招牌好易被拆爛，隨時演變成人生災難！
將時間校番去凌晨時分，阿澤被影到載長髮女返歸個Moment，長髮女見到閃光燈，驚到立即耷低頭屬人之常情，阿澤見狀就知大鑊，心急口快快爆粗：「你咪X耷低個頭呀！」他亦知道「老婆唔喺度約女出街被斷正」的危機處理，即Call班Friend上屋企Gathering開P，即使長髮女在相入面又如何，老婆見到都安心啲。經過一晚「痛定思痛」，昨午他去做Gym被記者追訪，當時面黑黑的他與記者真實對話如下。
記：記者 澤：杜汶澤
記：尋晚嗰位女士邊個嚟o架？
澤：我點會答你吖！
記：嗰位女士阿田識唔識o架？
澤：我點會答你吖！
記：阿田知唔知你帶女士返屋企呀？
澤：我點會答你吖！
三個問題，同一答法，之後阿澤做完Gym步出，再見記者被問到有關個女仔的事，他終於笑笑口「諗到」成件事出來！
記：個女仔住康樂園附近o架？
澤：佢馬來西亞人嚟！佢幫我化妝嘅！嗰時拍ViuTV《走佬去馬拉》嘛，佢嚟旅行嘛，咪一齊食飯，同我、教練同佢老婆……因為嗰陣時喺馬拉一齊拍走佬……好熟嘅！
分兩部車，我哋入咗嚟先，跟住去到閘口，見到你哋係咁閃，佢又唔係做呢行，好驚，成個縮埋，你試吓依家閃佢都縮埋o架！跟住冇呀，咪成班喺我屋企傾偈飲嘢，飲到兩、三點……。呢啲最緊要老婆知，老婆唔知大鑊！