藝人張沛樂（沙律）與羅伊婷（Daisy）為ViuTV節目《晚吹：女學生．吹水班》擔任嘉賓，由於話題圍繞讀書往事，兩女特意穿上校服及日式運動服亮相，沙律大談中學時暗戀的男生：「想送糖畀佢，但我又冇零用錢，惟有行路返屋企，慳番啲車費去買糖！」Daisy則搞笑指中學談戀愛特別刺激：「畀學校發現會記缺點，有次訓導處打畀我媽咪，佢好霸氣咁答：『我知道喎！我都見過嗰個男仔。』當老師話中學生拍拖唔適合，我媽咪反駁：『乜老師你中學冇拍拖咩？咁好遺憾喎！』大家都覺得我媽咪好型！」
