梅媽擺大壽使晒25萬撥款！
已故藝人梅艷芳的母親覃美金早前獲法庭批准在梅艷芳遺產信託中撥款25萬來擺95歲大壽，當時法官明言款項會以支票直接給予酒家，不會有錢經梅媽手。而上周六梅媽如願在尖沙咀舉行壽宴，她穿花旗袍，戴上珠鏈、玉手鈪及耳環貴氣登場，兒子梅啟明、圈中人楊峰、麥德羅等到賀。好友送的金桃及金觀音放滿枱上，梅媽更收到大大封利是，氹得老人家四萬咁口，更開心得跳起舞來。
記者致電梅媽恭喜她擺大壽，她中氣十足說：「多謝！」又稱當晚筵開26圍：「係好開心，好耐冇咁多人。（生日願望呢？）世界和平，個個身體健康。」問到25萬可夠錢支付壽宴？她說：「夠呀！（要唔要補貼？）唔使。（有冇使剩？）冇，使晒呀！」她稱金器已放回家，又謂利是會留來睇中醫買補藥：「係調理身體，話我依家老虎都可以打死幾隻呀！」