菊梓喬恨黐車飄移
歌手菊梓喬（Hana）昨日現身無綫活動，面對現場逾百部電單車，Hana自嘲細膽兼怕受傷，冇膽挑戰考電單車牌，反而想坐同公司的「烈女」譚嘉儀車尾，一嘗飄移的滋味。
菊梓喬、譚嘉儀、谷婭溦、陳健安等昨日出席無綫慈善節目《博愛歡樂傳萬家》啟動禮，現場有逾百部電單車及車手，非常壯觀。
感染「劇毒」唔使瞓
對於同門譚嘉儀鍾情揸電單車，Hana自認細膽怕受傷，從沒想過考電單車牌：「我搞唔掂呢個挑戰，所以都係坐嘉儀車尾算啦！希望佢帶我飄移，平時見佢啲相好型，片車片到好低！」談到有份獻唱內地劇《皓鑭傳》本地主題曲，她笑指身邊朋友「中劇毒」不停煲劇，還激讚好睇，令她心癢癢想開始追劇：「我有睇網上劇透同啲評論，好想即刻追，但我係會唔瞓一路煲劇嗰種人，所以要忍到做晒手頭工作，就可以展開煲劇生涯嘞！」
腳短翻側跌落地
而一身電單車手造型的嘉儀，透露節目當晚將與逾180位電單車手參與慈善巡遊，已考取電單車牌的她剛過了P牌階段，問到可嘗過揸快車滋味？她說：「唔會，太危險，雖然電單車好刺激，但返工戴住頭盔會整花個妝，個髮型又會塌，都係揸番私家車多。」更自爆當日先斬後奏，考完試才告知家人，她說：「係林師傑叫一齊考，點知我一Take合格，好好彩。但因為我唔高，有時停車隻腳會吊吊哋，我要單邊丁字腳掂地，試過失手令架車打側跌落地，搞到少少擦損瘀傷，但都無損我揸電單車嘅興致。」