許靖韻激走監製崩潰爆喊

當年只是一名中六生的Angela，正式簽約經理人公司後，即在英皇娛樂演藝創意學院展開長達8年的「禁室特訓」，每日放學後都會準時去學院報到，練歌、練琴至天昏地暗，她說：「練到啲職員收工先返屋企，呢個地方令當時仲未出道嘅我成長好多。」

缺點盡出逐粒音執

她坦言起初對錄音過程「零知識」，從未入過錄音室的她，對一切都感到陌生，但現時卻充滿回憶：「監製每日都會陪我喺呢度練歌、錄音，佢會仔細咁聽，再講番我啲缺點出嚟，嗰段時間嘅唱歌技巧進步好多。」

她坦言曾經有一段時期拍子感比較差，唱極都錯，搞到監製一怒之下衝出錄音室幾個鐘，被嚇窒的Angela就算人有三急也只好死忍：「不過冇諗過放棄，公司有好多師兄、師姐做榜樣，視佢哋為目標去努力，只係我覺得錄音好難，仲難過唱Live，錄歌會好仔細放大聽到自己啲咬字、抖氣聲、音準同技巧，唔係好適應。」

師姐鍾舒漫開解

問到可有試過偷喊？Angela自爆曾當住朋友面前崩潰大哭，更會特別搵師姐鍾舒漫開解：「佢係我喺呢間公司第一個識嘅人，得佢會聽我傾訴，有試過錄錄吓音，打畀佢話好辛苦，佢會好明白咁安慰我。」

英皇學院 練歌房有一部三角琴，陪伴Angela不少歲月。	許靖韻	由於不擅長跳舞，故Angela較少在鏡房流連。

零收入黐食快餐

每晚練習完畢，Angela必會到學院附近的茶餐廳開餐，皆因又方便又抵食，笑言已食勻餐牌上所有食物。今次再次到訪令她勾起以往的辛酸感：「好記得每次帶住練完歌嘅心情嚟食飯，嗰時冇乜收入，都係公司同事、監製請，就算到依家都好難有其他餐廳取代到呢份人情味。」

平食茶餐 Angela至愛食餐蛋麵、飲凍檸茶。	苦練唱功 曾錄製不少自創Demo的Angela，指錄音比唱Live更難。	Angela感激師姐鍾舒漫不時給予鼓勵。

返學練歌瞓得少

問到當時如何兼顧學業及唱歌？她表示好難取得平衡，因為一放學就要練歌，沒有時間溫書做功課，又影響作息：「嗰兩年係人生之中瞓得最少，每日都係一個循環，7點要起身返學，嗰時覺得年輕就堅持做落去。」屋企人有微言？Angela笑指屋企人都好放心，因為自己夠獨立，而且每日都會報告行蹤。

情人節快閃Busking

潮流興玩Busking，Angela當然唔「執輸」，出發參加內地節目《創造101》前，她膽粗粗於情人節玩快閃Busking，用歌聲同Fans交流：「嗰晚好深刻，有Fans拍拖過嚟，亦多咗好多人因為呢個Busking而認識我。」她坦言Busking是一個好獨特的音樂文化，既可以同觀眾近距離接觸，亦是傳遞音樂最快的渠道，想起大學時曾親自搵人借樂器、跟同學一齊搵地方、霸位、搬樂器的青春回憶。

百粉絲冒黃雨撐場

提到最難忘的一次，她指當年公開網紅「小背心」身份後，於短時間內再籌備了一場Busking，但竟遇上黃雨：「好擔心啲人嚟唔到，最後大概都有一百人，真係好感動。佢哋冒住好大雨嚟聽我唱歌，有個朋友仔仲義務幫我彈結他，佢拎住樂器成身濕晒！」

髮型：Veron@Hair Corner

化妝：Khaki Yan

服裝：ALAND