呂慧儀三點式出鏡畀管家仔兇
昨日處境劇《愛．回家之開心速遞》演員雲集電視城，呂慧儀被踢爆將有一場泳衣戲，她透露已向「老闆囝囝」蟹籽備案，但對方叫她「小心啲」。
近期《愛．回家之開心速遞》收視高企，昨日一眾藝員包括劉丹、單立文、呂慧儀、滕麗名、林淑敏、許家傑及歐瑞偉等到將軍澳電視城，宣布TVB為劇集加建17廠「威龍廣場」成為永久廠址。高層曾勵珍都有到場支持，眾人祝願劇集人財兩旺。
呂慧儀與滕麗名很開心劇集有固定場景，希望可以加入更多「商舖」令廣場擴建，阿滕說：「依家拍行街戲都唔使外景，希望遲啲有酒店、美甲同Spa。」呂慧儀更笑言想有桑拿浴室！兩人透露下周「熊家」將到番禺取景，阿滕爆呂慧儀與蘇韻姿將穿三點式上鏡，自己則負責食及跟盧宛茵互寸。呂慧儀直言要性感出鏡，首先要過兒子「蟹籽」一關：「佢好管我，無論髮型、衣着、影相，我同咗佢備案，佢叫我小心啲！哈哈！仲有佢唔鍾意我同人影相，有時行街有人要求合照，佢就唔開心，原來係想一齊影。」
林淑敏避咀許家傑
另外，「大小姐」林淑敏與「送水輝」許家傑表示會一直遇上新衝擊，問到何時才於螢幕前首度咀嘴？林淑敏說：「8點檔就唔好爭取喇！留番半夜12點後再合作先激啲啦！」許家傑亦希望兩人的感情線較為童話式。
