何超盈佗豬B生完葡國完婚
賭王何鴻燊四房長女何超盈近期盛傳懷孕，昨日她終於開腔報喜，並上載去年男友求婚的片段，四太對女兒雙喜臨門十分開心，因為今年是盲年不宜嫁娶，指超盈生完BB才結婚！據知超盈未婚夫Thomas是「哈爾濱之光」，以學霸成績入讀哈佛大學，兩人將於明年在葡萄牙堡壘舉行婚禮。
28歲的超盈去年爆出與Thomas Ｘin拍拖，Thomas生於哈爾濱，2016年考入哈佛大學，被傳媒封為「哈爾濱之光」！他是哈佛校內活躍分子，亦是劍道社隊長，文武雙全。
留Surprise畀媽咪
據知超盈懷孕剛滿3個月，她上載去年的求婚短片分享喜訊，片中她置身粉紅色氣球堆，Thomas下跪求婚，超盈Say Yes之後二人即甜蜜咀嘴，還晒出約4卡的求婚巨鑽！留言：「終於可以同大家分享呢個開心片段，希望畀一點空間我面對人生呢新一頁，我已準備好給一個驚喜畀媽咪爹哋#engaged（訂婚）。」她又以簡訊回覆：「我想有個生日Surprise畀媽咪，媽咪有叫我唔好蝦佢（未婚夫）。」又指明年夏天會在葡萄牙搞堡壘式婚禮。
四太梁安琪亦證實超盈雙喜臨門：「我唔係知咗好耐，因為佢之前去咗美國一段時間，返嚟見佢肥咗，仲叫佢減肥，點知佢話：『我總之會畀個Surprise你啦！』我即時就明咗啦。」
四太好滿意「女婿」
四太對未來女婿讚不絕口，亦替女兒開心：「佢係上進青年，對我個女好好。（怕唔怕超盈被指未婚懷孕？）今年係盲年，我信呢樣嘢，唔想佢哋結婚住，況且舊年佢哋已經訂咗婚，過咗盲年先搞婚禮。（何生知道未？）知道啦，佢好開心，仲豎起大拇指祝福佢哋！」昨晚四太現身養和醫院探賭王，全程四萬咁口，多次表示好開心，想超盈生多幾個：「一個小朋友會悶啲，生多一至兩個。（你湊？）我已經話我湊，佢話要諗，雖然我好忙，但會重新分配自己時間，我都唔細，想多啲見吓孫。」
而弟弟何猷君對家姐將踏進人生另一頁感到不捨，為她覓得好男人而開心，叮囑Thomas好好照顧家姐。而三房千金何超蓮亦戥超盈開心：「知道個男仔好錫佢，我暫時未見過，祝福佢啦！」
