歌手石詠莉昨日到電台宣傳新歌《動態回顧》，自爆之前一直哮喘發作，覺得作病與「污糟嘢」有關：「新年前去求籤，話我會好易撞鬼，之前我去墳場拍MV，對住個墓碑做戲，我諗就係咁唔小心撞到，就病咗成個月，同埋不停發啲噩夢，例如畀鬼追。」不過她未有搵師傅幫手：「好心安理得咁對住個天講，希望唔好再跟住我，有咩打攪到唔好意思，覺得最緊要個人正能量啲，就百毒不侵。」她承認老公鄧健泓很擔心，因為還有十幾首歌未錄。
