馮盈盈私藏王浩信裸照男友問罪
港姐馮盈盈拍劇為配合造型而「落髮」，她大灑鹽花，公然指自己要「護蔭」及試過「裂蔭」！又自爆手機收藏了大量王浩信的半裸照，令男友打翻醋埕。
馮盈盈、王浩信及高海寧昨午為新劇《極道怪咖》開工，劇中扮演女警的馮盈盈，要為角色「落髮」變齊蔭，她直言不習慣，更抵死地說：「依家我成日護蔭，兩個星期就剪一次髮，洗完頭要即刻吹蔭，有時又會出現裂蔭情況，因為以前分界嘛，一大風就分番開兩邊，我要用手掩住個頭。」令人忍俊不禁。
直認有眼福
她又自爆手機內藏有大量王浩信的半裸照：「佢有幾場除衫戲，身材弗爆，我幫佢影低啲靚相，諗住第時畀佢做劇集宣傳。今次好有眼福呀，除咗佢，朱敏瀚都操得好弗。（唔怕男友呷醋？）有日畀佢發現咗喇，我咪解釋囉，答應咗用完會刪除晒啲相。（逼佢操弗？）佢係斯文書生型，但都有人魚線，不過大髀好粗。其實以前我追星，好鍾意Super Junior，睇演唱會好期待佢哋除衫晒Body。」
負責放笑彈
被盈盈「偷拍」的王浩信則說：「呢幾日咁啱拍桑拿戲同紋身戲啫，佢幫我影低啲相留念。雖然呢排通告好密，我都盡量抽時間去健身。」他指今次角色負責放笑彈，問到有否喜劇細胞，他說：「我有潛質嘅，不過要好Close嘅朋友先Feel到我啲幽默感，都係留番畀觀眾評價，希望到時大家睇得開心。」
高海寧以民初裝扮現身，她在劇中扮演女藝人，要拍攝「戲中戲」，問到有否性感演出，她說：「嚟緊有場戲講我拍廣告打拳嘅，仲一拳打暈咗浩信。呢幾日都係食雞蛋同番薯，始終要露腰，想Fit啲。」